പ്രായത്തട്ടിപ്പ്; ഗൗരവ് മുഖിക്ക് അനിശ്ചിതകാല വിലക്ക്, ശനിയാഴ്ച ഹാജരാകാന്‍ നിര്‍ദേശം

ന്യൂഡൽഹി: ഐ.എസ്.എല്ലിലെ പ്രായത്തട്ടിപ്പ് സംബന്ധിച്ച വിവാദത്തിൽ അന്വേഷണം നേരിടുന്ന ജംഷേദ്പുർ എഫ്.സി താരം ഗൗരവ് മുഖിയെ ഓൾ ഇന്ത്യ ഫുട്ബോൾ ഫെഡറേഷന്റെ (എ.ഐ.എഫ്.എഫ്) അച്ചടക്ക സമിതി അനിശ്ചിത കാലത്തേക്ക് വിലക്കി. അന്വേഷണത്തിൽ അന്തിമ വിധി വരുന്നതു വരെ ഈ വിലക്ക് നിലനിൽക്കും. ഇക്കാലയളവിൽ താരത്തിന് ഒരു മത്സരത്തിലും പങ്കെടുക്കാനാവില്ല. അതേസമയം നവംബർ 24-ന് അച്ചടക്ക സമിതിക്ക് മുൻപാകെ ഹാജരാകാൻ ഗൗരവ് മുഖിയോട് നിർദേശിച്ചിട്ടുണ്ട്. വിഷയത്തിൽ ഗൗരവ് മുഖിയുടെ വാദം കേൾക്കാനാണിത്. ഐ.എസ്.എൽ അഞ്ചാം സീസണിൽ ഒക്ടോബർ ഏഴിന് ബെംഗളൂരുവിൽനടന്ന ബെംഗളൂരു എഫ്.സിക്കെതിരായ മത്സരത്തിലാണ് ഗൗരവ് മുഖിയുടെ പ്രായത്തട്ടിപ്പ് പുറത്തുവന്നത്. ഈ മത്സരത്തിൽ മുഖി ഗോൾ നേടിയിരുന്നു.ഐ.എസ്.എല്ലിൽ അരങ്ങേറുന്ന ഏറ്റവും പ്രായംകുറഞ്ഞ കളിക്കാരൻ എന്ന വിശേഷണത്തോടെയാണ് ഗൗരവ് മുഖി കളിക്കാനിറങ്ങിയത്. 16 വയസാണ് ഗൗരവ് മുഖിക്കെന്ന് ഐ.എസ്.എൽ അധികൃതരും പറഞ്ഞിരുന്നു. കമന്റേറ്റർമാരും ഇത്തരത്തിൽ തന്നെയാണ് താരത്തെ പരിചയപ്പെടുത്തിയത്. എന്നാൽ, ഫുട്ബോൾ താരങ്ങളുടെ പൂർണ വിവരങ്ങൾ ഉൾക്കൊള്ളുന്ന സെൻട്രലൈസ്ഡ് രജിസ്ട്രേഷൻ സിസ്റ്റത്തിൽ (സി.ആർ.എസ്) ഗൗരവ് മുഖി ആദ്യം സമർപ്പിച്ച ജനന തിയ്യതി04/05/1999 ആയിരുന്നു. പിന്നീട് സമർപ്പിച്ച രേഖകളിൽ ജനന തിയ്യതി04/05/2002 എന്നാണ് ഉള്ളത്. വിവിധ മാധ്യമങ്ങൾ റെക്കോഡ് സംബന്ധിച്ച വിവരങ്ങൾക്കായി എ.ഐ.എഫ്.എഫിനെ സമീപിച്ചപ്പോഴാണ് കള്ളി വെളിച്ചത്തായത്. 2015-ൽ നടന്ന ദേശീയ അണ്ടർ 15 ഫുട്ബോൾ ചാമ്പ്യൻഷിപ്പിൽ ജാർഖണ്ഡിന്റെ താരമായിരുന്നു ഗൗരവ്. എന്നാൽ ടൂർണമെന്റ് വിജയിച്ച ജാർഖണ്ഡിൽ നിന്നും പ്രായത്തട്ടിപ്പ് നടത്തിയതിന്റെ പേരിൽ എ.ഐ.എഫ്.എഫ് കിരീടം തിരിച്ചുവാങ്ങിയിരുന്നു. ഇതിൽ പ്രായത്തട്ടിപ്പ് നടത്തിയവരിൽ ഗൗരവും ഉണ്ടായിരുന്നുവെന്നാണ് റിപ്പോർട്ട്. ഗൗരവ് മുഖിയുടെ ജനനം 2002-ലാണ് എന്നായിരുന്നു എ.ഐ.എഫ്.എഫിന്റെയും ഐ.എസ്.എല്ലിന്റെയും രേഖകളിൽഇതുവരെ ഉണ്ടായിരുന്നത്. എന്നാൽ അത് തെറ്റാണെന്നും 1999-ലാണ് ഗൗരവ് ജനിച്ചതെന്നുംഎ.ഐ.എഫ്.എഫ് വക്താവ് അറിയിച്ചു. ഇക്കാര്യം കളിക്കാരുടെ സ്റ്റാറ്റസ് കമ്മിറ്റി അന്വേഷിക്കുമെന്ന് എ.ഐ.എഫ്.എഫ് നേരത്തെ വ്യക്തമാക്കിയിരുന്നു. Content Highlights: aiff summons gourav mukhi for hearing suspended till final decision is reached

from mathrubhumi.latestnews.rssfeed https://ift.tt/2qVCurK
via IFTTT